Kamfanin Dillancin Labaran Hauza ya rawaito cewar yayin darasin Akhlaƙ da ya gabatar wa ɗalibai da malaman Hauza a birnin Qum, ya bayyana cewa wajibi ne malamai su kasance tare da al’umma wajen gudanar da ayyukan da ke kansu, kada su bari jama’a su yi fice a gabansu wajen sauke nauyin da ya rataya a wuyansu.
Ayatullah Marwi ya kuma jaddada muhimmancin kula da koyarwar Sayyida Faɗima Zahra (AS), musamman huɗubobinta guda biyu, yana mai cewa fahimtar waɗannan koyarwa na daga cikin hanyoyin samun albarka a ilimin addini.
A wani ɓangare na jawabinsa, ya bayyana cewa matakin farko na inganta ruhi shi ne nisantar abubuwan da Allah Ya haramta, tare da fahimtar illolin zunubi, kamar gulma. Ya kuma yi kira ga ɗalibai da su ƙara kusanci da Alƙur’ani da addu’o’in Ahlul Baiti (AS), waɗanda ya bayyana a matsayin wata babbar taska ta tarbiyyar ruhi da kusantar Allah.
Ya ba da labarin wani likitan tiyata, Farfesa Blon, wanda ya ce ya musulunta tare da karɓar Mazhabar Shi’a bayan ya ji Ayatullah Sayyid Muhammad Hadi Milani yana karanta wasu sassa na addu’ar Abu Hamza Thumali yayin farfaɗowa daga tiyata. A cewarsa, wannan lamari ya nuna irin tasirin addu’o’in Ahlul Baiti wajen gina mutum mai zurfin ruhaniya.
Haka kuma, Ayatullah Marwi ya jaddada muhimmancin tashi da sassafe domin ibada da neman ilimi, yana mai cewa wannan dabi’a na daga cikin shawarwarin manyan malamai ga masu neman ci gaban ilimi da matsayi na ruhaniya.
A ƙarshe, ya yi kira ga malamai da ɗaliban Hauza da su kasance a sahun gaba wajen kare Wilayatul Faƙih, bin jagoran juyin juya halin Musulunci, Ayatullah Sayyid Mujtaba Husaini Khamene'i, da kuma kasancewa tare da al’umma wajen sauke nauyin da ke kansu.
Ra'ayinka